Ke Holo Nei Ka Hoʻomākaukau No Ka Hoʻolauleʻa Pākīpika Kūikawā

KŪKALA NŪHOU
20 Pepeluali 2020

HONOLULU, HI – He ʻehā mahina koe a hōʻea mai nā hoakipa no ka Hoʻolauleʻa Noʻeau A Moʻomeheu Pākīpika (FESTPAC), a ua mālama ʻia he ʻaha nūhou i kēia lā e nā komikina e alakaʻi nei i ka hoʻolauleʻa. E mālama ʻia ana ka hoʻolauleʻa ma nā lā 10-21 o Iune, 2020 me nā hanana like ʻole ma ʻō a ʻō o Honolulu me Waikīkī. ʻO ka makamua kēia o ko Hawaiʻi mālama ʻana i kēia hoʻolauleʻa.

Ke hoʻomākaukau nei ke kōmike no nā hoakipa he mau kaukani mai nā mokupuni Pākīpika a ma ʻō aku. ʻO “E Kū I Ka Hoe Uli” ka mākia o kēia makahiki.

“He hoʻomanaʻo ko mākou mākia i ke kūlana alakaʻi o nā kupa o ka Pākīpika ma ka hoʻokele ʻana i ka huli aniau o ka honua a me nā hopena o kēia huliau i ko mākou piko,” wahi a Kenekoa English, ka luna hoʻomalu o ke kōmike FESTPAC. “He hoʻomanaʻo kēia i nā ʻōpio e maliu i ke aʻoaʻo a nā kūpuna – e hoʻomau i nā moʻolelo a e hoʻōla i ka moʻomeheu a me ka ʻike kupuna.”

He hoʻolauleʻa holoholo ʻo FESTPAC i mālama ʻia ma kekahi ʻāina Pākīpika ʻokoʻa i kēlā me kēia makahiki ʻehā. Ua hoʻokumu ʻia e ka hui Pacific Community i mea e hoʻopakele i nā noʻeau moʻomeheu ma o ke kaʻana ʻana aku. Ua mālama ʻia ka South Pacific Arts Festival mua loa ma Pīkī ma ka makahiki 1972. Ua kapa ʻia ka inoa Festival of Pacific Arts & Culture i ka makahiki 1980. Ke hoʻomākaukau nei ʻo Hawaiʻi e hoʻokipa i nā lāhui Pākīpika he iwakālua a ʻoi i kēia makahiki.

Ma nā lā 11 o ka hoʻolauleʻa, e mālama ʻia he Kauhale, nā kūkākūkā moʻomeheu, a me nā hōʻikeʻike. E mālama ʻia ana ka ʻaha wehena ma ka Hale Aliʻi o ʻIolani, a e mālama ʻia ana ka ʻaha panina ma Kapiʻolani Pāka.


ʻO ka mālama olakino, ka hoʻohale, ke kiaʻi palekana, a he nui hou aku nā kumuhana e kūkākūkā ʻia nei e ke kōmike hoʻolālā. Mahalo nā komikina FESTPAC i ke kākoʻo o ka ʻAhaʻōlelo, nā keʻena mokuʻāina, ke Kalana ʻo Honolulu, a me nā hoa kākoʻo.

ʻO ke Keʻena Kuleana Hoʻokipa o Hawaiʻi (HTA) kekahi o nā hoa kākoʻo nui. Ua hoʻolaha mai nei ka Pelekikena a Luna Hoʻokele Chris Tatum i ke kākoʻo he $500,000 no ka hoʻolauleʻa.

“He hōʻoia ko mākou kākoʻo i kēia hanana kūikawā i ka hiki i nā hoa kipa ke ʻike kino i ka nani o Hawaiʻi, a aʻo no ka hoʻoilina nāna i alakaʻi i nā welo e kū nei i kēia lā,” wahi a Tatum.

Ke hana alu like nei nā komikina FESTPAC me nā hoa kākoʻo e like me Nā Kula ʻo Kamehameha a me ke Kulanui o Hawaiʻi no ka hoʻohale i nā ʻelele mai nā ʻāina Pākīpika.

Ua komo nā ʻelele Hawaiʻi i nā hoʻolauleʻa FESTPAC a pau mai ka makahiki 1976 a hiki i kēia. No ke komikina a kumu hula Snowbird Bento, he ʻelele no Hawaiʻi ma nā hoʻolauleʻa i hala, he hoʻāla ka hoʻolauleʻa i ka haʻaheo o ka Hawaiʻi.

“He mea nui ko Hawaiʻi mālama ʻana i ka FESTPAC i wahi hoʻomanaʻo i ko mākou piko – no ka nani kūhohonu o nā kūpuna, ʻaʻole hoʻi kau palena ʻia ka Hawaiʻi ʻana,” wahi a Bento.

Ua mālama ʻia ka ʻaha nūhou o kēia lā ma ka mahina hoʻohanohano ʻōlelo Hawaiʻi. No ka ʻike hou pili iā FESTPAC Hawaiʻi 2020, e like me ka papamanawa a me nā kahua hoʻolauleʻa, e kele aku iā festpachawaii.org.

No Ka ʻIke Hou (ʻŌlelo Pelekānia):
Donalyn Dela Cruz, Strategies360
donalynd@strategies360.com
(808) 216-4747

No Ka ʻIke Hou (ʻŌlelo Hawaiʻi)
T. Ilihia Gionson, Hiehie Communications
ilihia@hiehiecommunications.com
(808) 443-3120