HOʻOPAʻA ʻIA NĀ LĀ HOU O KA HOʻOLAULEʻA KAUʻĀINA ʻO FESTPAC HAWAIʻI

KŪKALA NŪHOU
11 MALAKI 2020

HONOLULU, HI – Ua hoʻolaha iho nei nā komikina o FESTPAC Hawaiʻi i nā lā e mālama ʻia ka Hoʻolauleʻa Moʻomeheu A Noʻeau Pākīpika 13 (FESTPAC), ʻo ia hoʻi nā lā 18-27 o Iune 2021. Ua paʻa mua ka hoʻolauleʻa no kēia Iune, a ma loko o ka makaʻala o nā kānaka a puni ka honua i ka holo ʻana o ka maʻi COVID-19, ua hoʻoholo ʻia he kūpono ka hoʻopaneʻe ʻana i ka hoʻolauleʻa no ka pono a palekana o nā kamaʻāina Hawaiʻi a me nā hoakipa.

“E paʻa ana he hoʻoilina hou ma Hawaiʻi i ka makahiki 2021. Ke hiki mai nā hoahānau mai ʻō a ʻō o ka Pākīpika, e ʻike kino ana lākou i ka hoʻokipa pumehana, ka hoʻopaʻa pilina, a me ka huliau pilikino e like me kai ʻike ʻia e nā Hawaiʻi i komo mua i kēia hoʻolauleʻa,” wahi a Kenekoa J. Kalani English, ka luna hoʻomalu o ke kōmike FESTPAC. “Ke mau nei ka hoʻolaukaʻi me nā pakanā a kākoʻo no ka hoʻopaʻa i ke kūlana o FESTPAC Hawaiʻi he hoʻolauleʻa kūikawā nō.”

He hoʻolauleʻa holoholo ʻo FESTPAC i mālama ʻia ma kekahi ʻāina Pākīpika ʻokoʻa i kēlā me kēia makahiki ʻehā. Ua hoʻokumu ʻia e ka hui Pacific Community ma ka makahiki 1972 i mea e hoʻopakele i nā noʻeau moʻomeheu ma o ke kaʻana ʻana aku. Ma ka holo ʻana o ka manawa, ua komo nā ʻāina like ʻole a loaʻa mai ka Hoʻolauleʻa Moʻomeheu A Noʻeau Pākīpika a ka honua e kamaʻāina nei. Ua hoʻopaneʻe ʻia ka hoʻolauleʻa hoʻokahi wale nō manawa ma mua – ma ka makahiki 1984 – ma muli o ka hulihia kālaiʻāina ma Nū Kaledonia, ua hoʻoneʻe ʻia i Polenekia Palani.

Ma ka makahiki 2016, ua mālama ʻia ka hoʻolauleʻa FESTPAC 12 ma Guam me nā hoakipa he 90,000. Ke hoʻomākaukau nei ke kōmike e hoʻolālā nei i ko Hawaiʻi hoʻolauleʻa no nā ʻāina he 28, nā ʻelele he 3,000, a me nā hoakipa he nui a lehulehu.

No ka ʻike hou loa no FESTPAC Hawaiʻi, e kele aku iā festpachawaii.org.

-PAU-