HOʻOLAHA ʻIA NĀ LĀ HOU NO FESTPAC MA HAWAIʻI MA KA MAKAHIKI 2024

HOʻOLAHA
NO KA HOʻOKUʻU ʻĀNŌ

1 Iulai 2020

HONOLULU, HAWAIʻI – Ua paʻa nā lā hou no ka Hoʻolauleʻa Noʻeau A Moʻomeheu Pākīpika 13 (FestPAC), e mālama ʻia ana ma nā lā 6-16 o Iune 2024. Hoʻolaha ʻia kēia mau lā hou e Ke Kaiāulu Pākīpika (SPC), ke kahu mālama o FestPAC, a me nā kupa o Hawaiʻi e mālama ana i ka hoʻolauleʻa. Na ka ʻAha Kūkā Noʻeau A Moʻomeheu Pākīpika (CPAC) i hoʻoholo i kēia hoʻopaneʻe ʻana i mea e mālama mua ʻia nā kuleana olakino, hoʻokele waiwai, a palekana pili i ka maʻi COVID-19 a puni ke ao.

“Ua pīhoihoi no mākou i ka hoʻokipa iā FestPAC i kēia makahiki. Nui naʻe nā hopena e pono e noʻonoʻo ʻia pili i ka maʻi COVID-19 ma Hawaiʻi a puni ka Pākīpika,” wahi a Kenekoa J. Kalani English, ka luna hoʻomalu o ke Kōmike no ka Hoʻolauleʻa Noʻeau A Moʻomeheu Pākīpika ma Hawaiʻi. “Ke kūkākūkā nei nā komikina i ke ʻano e hōʻoia ʻia ka papahana e hāpai i ka nani o nā moʻomeheu ʻōiwi, a me ke ʻano e hoʻokipa pono ʻia nā hoakipa. Ua lawa nō ka manawa e hoʻomākaukau ai mākou.”

Mau nō ka hālāwai kūmau o ke Kōmike FestPAC Hawaiʻi ma lalo o ka malu o ka ʻOihana Hoʻoulu Hoʻokele Waiwai a Hoʻokipa (DBEDT). Ua hāpai ʻia ka manaʻo hoʻopaneʻe a ke kōmike i mua o CPAC ma ka lā 20 o Mei 2020. Ua hoʻokumu ʻia he hui no ka ʻimi i ke ala kūpono e ulu pū ai ka hoʻolauleʻa me nā loli o ke kaiāulu Pākīpika, a me ka hōʻoia hou i ke kūlana koʻikoʻi o ka noʻeau a me ka moʻomeheu.

“ʻO ka hoʻopaneʻe ʻana i ka hoʻolauleʻa i ka makahiki 2024, he mahalo ia i ka waiwai o FestPAC me ka hoʻomanaʻo pū i nā hopena o COVID-19 i nā ʻāina Pākīpika,” wahi a Leituala Kuiniselani Toelupe Tago-Elisara, ka luna hoʻokele o ka Papahana Hoʻomōhala Kanaka a ka SPC. “Mau nō ka hana alu like me ko Hawaiʻi a me nā ʻāina Pākīpika no ka ʻimi i nā ala ʻoi kelakela i mua.”

Ua paʻa mua ka mālama ʻia ʻo FestPAC ma Hawaiʻi ma nā lā 10-21 o Iune 2020. ʻO ia ka hoʻolauleʻa nui mua loa i hoʻopaneʻe ʻia ma ka holo ʻana o ka maʻi COVID-19 a puni ka honua. Ua hoʻoholo ʻia ka hoʻopaneʻe ʻana no ka hoʻopakele i ke olakino o nā kamaʻāina o Hawaiʻi a me nā hoakipa mai ʻō a ʻō. Mālama kēia hoʻopaneʻe i nā makahiki ʻehā i waena o nā hoʻolauleʻa, me ka ʻae pū i ka manawa e polapola ai nā ʻāina Pākīpika mai nā ʻeha hoʻokele waiwai a kaiāulu pili i ka maʻi.

No ka hoʻomākaukau pono ma mua o ka hoʻolauleʻa, ke mālama ʻia nei nā hālāwai kūmau a ke Kōmike FestPAC Hawaiʻi ma o ka ʻenehana ʻāloaloa, a hiki ke nānā ʻānō ma ka ʻaoʻao Facebook a DBEDT. Kaʻana ʻia nā papa kumumanaʻo ma ke kahua paʻa pūnaewele a DBEDT hoʻokahi pule ma mua o nā hālāwai. E kaʻana ʻia ka ʻike ma nā ʻaoʻao Instagram, Facebook a Twitter @FestPACHawaii kekahi.

No ka Hoʻolauleʻa Noʻeau A Moʻomeheu Pākīpika
ʻO ka Hoʻolauleʻa Noʻeau A Moʻomeheu Pākīpika (FestPAC) ka hanana nui loa o ka honua e hāpai ana i ka nani o nā ʻōiwi Pākīpika. Ua hoʻokumu ʻia ka hoʻolauleʻa i ka makahiki 1972 e ke Kōmike Pākīpika Hema (kapa ʻia i kēia manawa Ke Kaiāulu Pākīpika – SPC) no ka hoʻoikaika i ka ʻike kuʻuna ma o ke kaʻana like me nā hoa ʻōiwi. E mālama ʻia ana ka Hoʻolauleʻa Noʻeau A Moʻomeheu Pākīpika 13 ma Hawaiʻi ma Iune 2024. No ka ʻike hou, e kipa iā festpachawaii.org.

No ke Kaiāulu Pākīpika
ʻO ke Kaiāulu Pākīpika (SPC) ka ʻahahui loea ʻoi kelakela ma ka Pākīpika, e kākoʻo ana i ka hoʻomōhala mai ka makahiki 1947 a hiki i kēia. He ʻahahui hoʻomōhala kauʻāina ia ma lalo o ka malu o nā lālā aupuni he 26. Komo ka hui i ka hana ma nā kumuhana he 20 a ʻoi me ka maopopo pono i nā pōʻaiapili me nā moʻomeheu Pākīpika. Hanohano ka hui no ka ʻike me ka noʻeau ma ka mahi iʻa, ka makaʻala olakino, ka hulihonua, a me ka mālama i ka moʻokūʻauhau meakanu no ka hoʻopakele ʻai.